اوی‌نینگ ایکینچی قبتیده‌گی کلکین آرقه‌سیدن باغ‌نینگ گۉزل منظره‌سینی کوزه‌تیب، رسم چیزردیم. قویاش پارلب چیققن، باغده‌گی اۉتلر اېندی کۉکرگن و درختلرنینگ یپراغی اېندی استه – سېکین آچیله باشله‌گن. کېچه‌گی مَه‌یین یامغیردن قالگن تامچیلر حلی درخت یپراغی و کۉکتلر برگیده یلتیلب کۉرینه‌دی. ییل‌نینگ سۉنگی کونلری نوروز و ینگی ییلگه فقطگینه بیر – ایکی هفته قالگن. کیچیکینه بیر موتر باغیمیزنینگ دروازه‌سی قرشی‌سیگه کېلیب تۉخته‌دی و اوندن آته‌م توشیب پیاده بۉلگنینی کۉردیم. نېچه‌ته کۉچت (نهال)نی موتردن آلیب توشدی آته‌م. شاشیلیب آته‌مگه باردیم بېره‌ی دېب باردیم. کۉچتلرنی بیرگه‌لیکده باغیمیزگه آلیب باردیک. ایلدیزی (ریشه‌سی) لایلنگن نهاللرنینگ تامیری پلاستیک خلته‌گه اۉره‌لگن اېدی. آپاققینه ایت بچه‌م یوگوریب کېلیب پلاستیکلرنی بیرمه بیر ایسکب اۉتدی. هیچ وقت اونگه باشقه بیر آت تنلمه‌گنیم اوچون افسوس قیله‌من. او هر دایمگیدېک دُمینی قیلقیلّه‌تیب خدمتگه تیار اېدی. آته‌مگه بیرگه‌لشیب کۉچتلرنی باغ‌نینگ هر یېری‌گه اېکدیک. آته‌م مېنگه قره‌ب دېدی:
– امیدجان، منه بو شفتالو کۉچتنی اۉزینگ اېک قنی.
ـ راستنمی؟ نېگه اېکمه‌ی.
